17-May-14 濕焗悶熱下的長課 52K (沙田 <-> 北角,中環 來回)

    其實今朝天氣唔太差, 雖然落雨, 但有風唔太焗. 但之後情況完全逆轉, 好... 開始詳細報告今日慘烈的一課~

    由明星舫起步, 初段至顯徑感覺唔錯, 雖然雨勢時大時細, 但有風同埋係清晨, 氣溫唔高, 都幾清涼. 到達顯徑巴士總站, 經傍邊一條勁斜小路叫"徑口路"上大埔道, 因仍處於頭段關係, 手上大把貨, 輕輕鬆鬆keep住5'30/k pacing, 依照計劃到達深水埗嘉頓, 沿欽州街經過多個燈位又停又跑, 直落深旺道左轉, 一路殺呀殺呀~

    大角咀...旺角道口...佐敦道口, 落隊道左轉右轉, 途經魔警駁火果個梯口... 終於上番地面已經係中港城, 可能時間尚早, 未見太多強國人, 好...快速地跑過廣東道, 過埋梳士巴利道左轉藝術館同星光大道外圍. 星光大道盡頭上斜, 跑一段天橋就可以到達紅磡海濱長廊, 話咁快到左紅磡碼頭, 望一望上船時間表, 噢~~ 重有成20分鐘, 唔好嘥, 向前跑多10分鐘再返轉頁頭上船~~

    話時話, 依家搭船原來都幾貴, 紅磡去北角要成$6.3, 但中環去尖沙咀只係$3.4...爭咁遠!! 好啦... 到左北角碼頭, 第一時間緊係去補水先... 正!! 碼頭有間7仔, 惦~ 事不宜遲, 馬上繼續旅程, 沿渣華道, 轉入興發街, 到銅鑼灣消防局直去告士打道, 去到分域碼頭轉入龍和道, 途經政府總部同立法會. 終於到左中環7號碼頭, 咪理咁多, o拿o拿林上船先~~

    一到尖沙咀天星碼頭就馬上頭痛, 自由行大軍已經殺到~~ 此地不宜久留.... 閃~~

   之後沿住來程路線折返, 係濕熱d, 但都尚算ok. 直至..... 去到深水埗, 預期嘅情況終於出現 - 太陽大哥強勢登場!! 本來34度烈日當空都冇有怕, 但唔好忘記今日濕度奇高, 加上整個上午都落雨, 地下d水蒸番上黎果下, 簡宜係無間地獄~~

    好嘞~ 曬住又蒸住咁去到嘉頓, 心知前面有3k全斜路等緊我嘆. 唔理咁多, 衝入上李公園個公厠洗洗面, 飲淡水定一定神先~~ 起程!! 嘩...一路上斜果種感覺...突然覺得自己係一個巨型蒸籠入面一粒"孤獨嘅燒賣仔", 不斷咁蒸呀~ 蒸呀~ 究竟幾時先有人買我呢粒小燒賣, 可以離開呢個死人蒸籠?

    一直頂到爾登華庭, 5'30/k 嘅步速終於守唔住....跌落5'40/k.... 等我形容下當時太陽有幾猛烈 - 即使當時濕度奇高環境之下, 居然都可以矖到我滿身鹽粒... 你諗下當時水份蒸發速度之高? 而地下周圍都有積水, 果d蒸汽真係~~

   過埋赫德傑山, 金山郊野公園在望, 就係呢個時候出現強烈頭疼, 經驗話我知再唔處理有機會中暑及脫水. 跑到金山郊野公園馬上走入厠所洗面降溫, 再o都支水行埋陰涼地方休息左10分鐘, 頭痛情況消失左啦~ 好.. 繼續上路~~

    過埋金山之後至徑口路係全落斜, 啟動慳力模式, 只需要控制下步速就無問題啦~~ 到左徑口路右轉落番顯徑, 可能返到自己地頭, 精神大振地以5'20飛番屋企, 途中同幾個ching打個招呼... 哈哈~~ 自己地頭果然唔同~

後記:
    響呢度要同渡船街果間7仔阿姐say sorry, 我買完水諗住倒入水樽之際, 打潟左... 攪到一地都係~~

多謝各位睇哂咁長嘅報告, 下次有機會再傾~~

孤獨嘅燒賣仔上

呢張係響龍和道政府總部前少少公厠影嘅~

5-Apr-14 鬧市中的長課 53K (沙田 <-> 北角,中環 來回)

    跑得多新界線路, 悶悶地近排又想轉下口味, 玩下downtown.

   上星期六走左轉沙田到紅磡碼頭, 搭船過北角, 向中環繼續跑, 再由中環搭船番尖沙咀, 再原路跑番沙田. 雖然條路線唔係好長, 只得53k, 但沿途咩景色都齊哂, 有山有水有鬧市, 非常好玩~

   黎緊夏季計劃由沙田跑去石澳, 然後游水曬太陽, 最重要係可以用眼睛去旅下行~~ 哈哈~

4-Jan-14 首次東征長課 49K (沙田->西貢 來回)

    經過數次北伐至沙頭角, 開始計劃東面路線~ 初步計劃先試探式經西沙公路, 走沙田至西貢來回. 照舊先響google map實境行轉西沙, 行人路位正常~ 出發~

    頭段明星至馬鞍山唔詳述, 太熟悉啦 (其實係悶)~ 去到西沙茶座, 面向西沙公路, 心諗: 呢條路揸車就揸得多嘞, 唔知跑又咩滋味? 頭先響馬鞍山長廊已經補滿水入水樽, 好~ 殺呀~

    開始都係上斜為主, 斜度ok, 幾舒服~ 沿途風景唔錯, 可能時間比較早, 唔多車, 空氣唔錯~ 過埋水浪窩, 去到入榕樹澳路口, 去燒烤場厠所洗洗面飲下水, 果度好多行山人仕歇息, 大家打下招呼~ 互相鼓勵一下~

    跟住繼續行程, 之後一路落斜, 至到西貢燒烤場迴旋處, 如果轉左U turn就入北潭涌, 靠右大網仔路直去西貢碼頭~ 今次靠右去西貢碼頭, 下次試下入北潭涌, 去黃石碼頭走走~

    之後一直上上落落,  去到西沙水上活動中心, 轉落樓梯沿海邊跑, 終於到達西貢碼頭~ 碼頭當時好多人, 有居民, 有遊客, 有等上船嘅大班年輕男女, 非常熱鬧~ 而我先去7仔補水, 再四處走走, 睇下野~ 大概15分鐘後, 起程折返沙田, 回程冇咩特別, 係西貢燒烤場迴旋處至榕樹澳路口, 果段上斜比較費力外, 其餘都係輕鬆完成~

    經馬鞍山長廊返到孖橋, 覺得重有好多貨, 望望錶原來只係得35k, 咁鬼短嘅??!! 好~ 直去科學園補番14k先返明星~

後記:
   呢次小試牛刀去到西貢碼頭, 跟住就plan攻入最東萬宜水庫~~

26-Oct-13 超越極限耐力長課 61K (沙田->鹿頸->粉嶺->太和->沙田)

   各位~~ 我返黎啦, 唔死得之餘, 重成功挑戰61k 耐力長課~ Yeah~

   先講講路線— 明星->吐公->汀角路->大美督->鹿頸->沙頭角->粉嶺->太和->元洲仔->吐公 ->明星, 今日狀態基本上極好, 頭段一直去到粉嶺軍地, 都冇倦嘅感覺, 係去到太和開始跌watt, 但神奇地去到吐公又充滿力量, 臨尾50-61k重加速, 連我自己都驚~

     But anyway, 總算完滿挑戰成功, 響度多謝咁各位跑友對小弟嘅支持~~

跑到冇哂表情~

全身都係鹽, 途人報以奇異眼光~

19-Oct-13 突破極限長課 53K (沙田明星<-> 鹿頸 來回)

     天氣越來越舒服, 唔破下紀錄實在對唔住自己~ 

     原本計劃回程去到孖橋, 走多轉馬鞍山先至返明星海鮮舫, 咁就剛好60K, 但回程去到吐公發覺個人開始斜斜地, 狀態明顯冇上次咁勁, 惟有唔入馬鞍山, 最後53K收工~

 

 

 

 

 
 

28-Sep-13 秋風送爽谷里數 長課 50K (沙田->馬鞍山->大美督水壩->沙田)

    今日狀態唔錯, 加上秋風送爽, 回程去到46K, 覺得唔夠喉, 決定操長d, 再去到50K, 其實重有貨想再去, 但睇睇錶~~ 噢~~ 夠鐘湊細路!! 冇計, 惟有鳴金收兵, 下回再戰~

7-Sep-13 曝曬下的長課 47K (沙田->馬鞍山->大美督水壩->沙田)

     見近排開始乾爽左, 又係LSD谷距離時候, 琴日試上番47K, 感覺都唔錯, 係就曬到嘔, 但都總好過弱風高濕度~ 黎緊會盡快谷上65-70K, 希望年底前一嚐100K嘅滋味~

各位跑齊齊加油~~ 共勉之~

後記:
    今日踩左60K單車, 又係曬到暈..... 依家變左非洲黑人~~