17-Jan-15 超馬賽預備超長課 74K (沙田->大圍->馬鞍山->大美督->沙公->粉嶺->太和->沙田)

Hello~ 各位, 小弟都好耐冇出報告, 實情訓練就一直冇停, 只係小弟實在太懶打字同寫文~

   因為呢次超長課主要為為超馬賽作預備, 所以會跑得比較認真, 主要集中嚴控pacing同心率, 全程留意住身體反應情況, 分配體力等等~ 因此冇咩時間影靚相俾大家欣賞, 同埋今次報告亦會比較簡短, 敬請見諒~ OK, 馬上入正題~

   事緣小弟參加左1-Feb個超馬賽, 今日諗住黎個賽前終極超長課, 咁緊係要breakthrough一下, 之前record high係65k, 咁70k就一定走唔甩啦~ 琴晚計劃好條route, 計埋數用咩pacing , check point時間, 就嗱嗱林早d訓, 抖足精神~

   天未光就起身, 例牌5片麵包加杯齋啡做早餐, 攪惦就換戰衣, 上齊裝備, 出發~ 起步點為明星海鮮舫, 先去顯徑再折返城門河, 經孖橋入馬鞍山長廊, 到盡頭再返孖橋先入大尾督, 好處係未入大埔已經跑左21k, 咁樣就保證唔會臨尾縮沙走數~

   經吐公到元洲仔, 大埔海濱穿過工業村, 沿汀角路到達大尾督. 洗洗面, 食左包餅就殺上新娘潭路入鹿頸, 再順住沙頭角公路去到粉嶺~ 左轉右轉黎到大窩東支路同九龍山, 呀~ 發覺已經舖靚哂條路, 可能我太耐冇黎, 以前條路爛到阿媽都唔認得, 又多村狗~ 依家就好好跑o羅~

   過埋九龍山去到水圍, 又係靚仔路, 重分開單車同人, 以前係窄到嘔兼人車爭路, 好鬼煩~ 過埋太和跟住又跑返到元洲仔, 響大王爺廟隔離公園, 撞見有個跑友話睇開我個跑步blog, 吹左兩句又繼續上路~ 回又經番吐公, 水廠街回到孖橋, 睇睇錶已經跑左72.5k, haha~ 呢次重唔record high!! 快快手跑返明星就正式完成呢課超硬野~

後記:
最初本來計劃用平均6分pacing, 頭半段進取d用5分25 pacing, 咁就算後段跌watt都唔會跌出6分~ 但係今日好似食左藥, 上鹿頸頭段長命斜都一樣keep到, 就算去到50k都係跌左5秒, 咁就玩盡d, 一於keep 5分半左右到尾~

  雖然風景相就少d, 但大家至愛嘅閃咭系列就緊係繼續供應啦~ 記得print出黎過膠放銀包啦~

終於明白一直不斷超長課, 其實係追求緊d 咩?? 究竟呢個係唔係一個終極答案???

今次想同大家分享下一d對跑步嘅諗法~

    唔止一次，有人問我點解要跑咁長同咁密? 又越追越長，又要烈陽又要暴雨? 就算玩超馬亦唔需要咁攪法?

    而我自己亦有分析過: 比賽其實我唔太熱衷，因為唔鐘意俾人規定呢樣，規定果樣，咁究竟我追求緊d咩呢? 其實就連我自己都唔知～ 所以每次都只係是但答: 我鐘意囉～

不過，我諗我已經搵到答案，雖然未知係唔係終極答案～

我終於知道，原來我一直想找尋嘅，並唔係能力嘅上限，亦唔係簡純嘅痛楚～

而係果種瀕死，最接近死亡嘅感覺～

原來係叫”湼槃的精神狀態”～

   唔覺意睇到呢段野，最後形容果種感覺，就好似終於搵到知音人一樣，開心到要即刻同大家分享一下～

23-Aug-14 熱血狂人 - 環港島超長課63.5k

    自從上次六月尾試過第一次環島之後，一直心思思想再跑～ 一來上次帶病上陣，覺得表現麻麻，二來第一次跑唔熟路，跑一陣又要睇GPS, 又跑錯路又盛，攪到好唔爽同唔夠盡興! 而今次無論精神同體能狀況都非常good fit, 天氣雖然都係曝曬，但比起上次已經較為舒服，一切都完美配合，唔盡情環島跑獲金就真係對唔住自己囉～

   因為今次同上次環島路線大致相同，所以今次報告就只會補少少相, 同埋唔太多詳述，如有興趣可到<<28-Jun-14 環港島一週 - 無懼病魔 熱血制霸 57K 長課>>，重溫番上次環島嘅詳細報告～

   今次改由鯉景灣嘅港島體育館（電影資料館隔離）作為起點及終點～ 鎖好行李後就向東順時針方向跑，經小西灣上砵甸乍山，到達大浪灣，沿大浪灣道，石澳道，落港島徑第七段，穿過大潭篤村，上老虎山引水道，落番赤柱峽道，沿 赤柱村道去到赤柱廣場～而最難捱就係呢段，之後經淺水灣，深水灣，黃竹坑道，華富邨，數碼港，沿域多利道出到西環，上環，中環.........一直沿住 海岸線，最後終於完成環島一周，返到終點 — 港島體育館.

總結：

   今次環島超長課，可能天氣較為舒服，加上期待左再次環島好耐，體能異常地好，尾段至北角居然重可以加速，返到港島體育館，重游左一個鐘頭水，先至梳洗走人～

- 完 -

5-Jul-14 對抗極強酷熱天氣 58K 超長課 (沙田->紅磡->彩虹->西貢->沙田)

    經過數次超長課南征西討, 加埋上星期帶病環港島一役, 本來諗住安排今日跑條比較熟悉, 同難度較為低嘅路線, 當歇一歇, 順便整固下, 點知… 頂~ 今日熱到真係癲Q左, 中午直指34度~ 雖然最後都仍然完成, 但尾段開始失速, 好彩頭中段Pacing都keep得住, 全段平均步速都唔太差~

    今次唔需要搭車去起點, 所以唔駛咁早起身, 又可以輕鬆一d, 而且琴晚訓得唔錯, 感覺今日狀態good fit. 享用過例牌早餐四片麵包+齋啡, 攬惦哂d裝備, 換上戰衣, 落樓出發啦~

    頭段20k沙田明星至紅磡駕輕就熟, 全程進入巡航模式~ 係大埔道中段至深旺道落過一陣雨, 但反而重舒服, 幫我保留住d energy, 而且呢段之前報告講過太多次, 唔再詳述~

    過左紅磡碼頭左轉戴亞街直出, 戇居居出左馬頭圍道, 人多到連行都成問題, 嗱嗱林返轉頭由紅磡道去, 經過旭日街, 朗月街, 土瓜灣道, 左轉出宋皇臺道, 沿途真係曬到阿媽都唔認得, d皮膚係痛嘅~ 雖知道我已經係日曬夜曬, 練到已經無論點曬唔會再甩皮, 但依然感覺火辣刺痛, 可想而知今日簡直係跑者嘅無間地獄~

    走過亞皆老街同太子道東果段亂七八糟嘅交界, 沿太子道東直去到彩虹村, 跟住就上清水灣道, 經過彩雲二邨再上, 過埋”歡迎駕臨西貢區”牌, 之後有兩個油站, 緊係第一時間補水先, 途中經過上札山道路口, 好似記得有ching 提過呢度, 話斜度好高, 下次有機會挑戰下, 見識下~

    補完水就繼續旅程, 走過井欄樹, 向上見到遠處壁屋監獄, 知道硬仗終於殺到, 當時真係嘔血, 又熱又曬, d皮膚又火辣刺痛, 加埋果條死人大斜, 但知道捱過壁屋之後係超級甜品, 即時唔理咁多衝上去~

    哈哈~ 捱過壁屋再走一小段, 跑過嘅ching / ctse都知, 之後果段2.5k至西貢公路真係爽到核爆, 全程大落斜, 而且路闊唔焗, 馬上啟動慳力模式, 只要控制住pacing唔好過快就惦~

    落到迴旋處發覺冇哂水, 又口渴到死, 好彩前d匡湖居有間沙漠中嘅7仔, 馬上飛身撲入去, 補水之餘順便歇番陣, 出面實在曬到PK, 開始有d頭痛~

    跟住途經白沙灣遊艇會, 獅子會自然教育中心, 菊花牌漆油廠, 終於到達西貢市中心, 左轉右轉去到西貢碼頭, 非常非常熱鬧~ 先去厠所洗面同用水淋頭降降溫, 再去OK補水, 順便周圍行下睇下女~

    響碼頭逗留左一陣, 歇左一陣諗住回復狀態, 最後呢20k要keep住pacing應該問題不大, 點知去到水浪窩開始跌watt, 響失速同極度疲倦情況下, 惟有咬住牙根不斷同自己講: “There will be a day when I can no longer run. Today is not that day”, 直至返回明星.

呢段由西貢碼頭至明星, 詳細路線請參考<<4-Jan-14 首次東征長課 49K (沙田->西貢 來回)>>.

後記:
    呢次真係低估左天氣嘅威力, 始終同大自然相比, 人嘅力量實在係好渺小~  收睇多謝~

-完-