經過數次超長課南征西討, 加埋上星期帶病環港島一役, 本來諗住安排今日跑條比較熟悉, 同難度較為低嘅路線, 當歇一歇, 順便整固下, 點知… 頂~ 今日熱到真係癲Q左, 中午直指34度~ 雖然最後都仍然完成, 但尾段開始失速, 好彩頭中段Pacing都keep得住, 全段平均步速都唔太差~
今次唔需要搭車去起點, 所以唔駛咁早起身, 又可以輕鬆一d, 而且琴晚訓得唔錯, 感覺今日狀態good fit. 享用過例牌早餐四片麵包+齋啡, 攬惦哂d裝備, 換上戰衣, 落樓出發啦~
頭段20k沙田明星至紅磡駕輕就熟, 全程進入巡航模式~ 係大埔道中段至深旺道落過一陣雨, 但反而重舒服, 幫我保留住d energy, 而且呢段之前報告講過太多次, 唔再詳述~
過左紅磡碼頭左轉戴亞街直出, 戇居居出左馬頭圍道, 人多到連行都成問題, 嗱嗱林返轉頭由紅磡道去, 經過旭日街, 朗月街, 土瓜灣道, 左轉出宋皇臺道, 沿途真係曬到阿媽都唔認得, d皮膚係痛嘅~ 雖知道我已經係日曬夜曬, 練到已經無論點曬唔會再甩皮, 但依然感覺火辣刺痛, 可想而知今日簡直係跑者嘅無間地獄~
走過亞皆老街同太子道東果段亂七八糟嘅交界, 沿太子道東直去到彩虹村, 跟住就上清水灣道, 經過彩雲二邨再上, 過埋”歡迎駕臨西貢區”牌, 之後有兩個油站, 緊係第一時間補水先, 途中經過上札山道路口, 好似記得有ching 提過呢度, 話斜度好高, 下次有機會挑戰下, 見識下~
補完水就繼續旅程, 走過井欄樹, 向上見到遠處壁屋監獄, 知道硬仗終於殺到, 當時真係嘔血, 又熱又曬, d皮膚又火辣刺痛, 加埋果條死人大斜, 但知道捱過壁屋之後係超級甜品, 即時唔理咁多衝上去~
哈哈~ 捱過壁屋再走一小段, 跑過嘅ching / ctse都知, 之後果段2.5k至西貢公路真係爽到核爆, 全程大落斜, 而且路闊唔焗, 馬上啟動慳力模式, 只要控制住pacing唔好過快就惦~
落到迴旋處發覺冇哂水, 又口渴到死, 好彩前d匡湖居有間沙漠中嘅7仔, 馬上飛身撲入去, 補水之餘順便歇番陣, 出面實在曬到PK, 開始有d頭痛~
跟住途經白沙灣遊艇會, 獅子會自然教育中心, 菊花牌漆油廠, 終於到達西貢市中心, 左轉右轉去到西貢碼頭, 非常非常熱鬧~ 先去厠所洗面同用水淋頭降降溫, 再去OK補水, 順便周圍行下睇下女~
響碼頭逗留左一陣, 歇左一陣諗住回復狀態, 最後呢20k要keep住pacing應該問題不大, 點知去到水浪窩開始跌watt, 響失速同極度疲倦情況下, 惟有咬住牙根不斷同自己講: “There will be a day when I can no longer run. Today is not that day”, 直至返回明星.
呢段由西貢碼頭至明星, 詳細路線請參考<<4-Jan-14 首次東征長課 49K (沙田->西貢 來回)>>.
後記:
呢次真係低估左天氣嘅威力, 始終同大自然相比, 人嘅力量實在係好渺小~ 收睇多謝~
-完-
