終於明白一直不斷超長課, 其實係追求緊d 咩?? 究竟呢個係唔係一個終極答案???

今次想同大家分享下一d對跑步嘅諗法~

    唔止一次，有人問我點解要跑咁長同咁密? 又越追越長，又要烈陽又要暴雨? 就算玩超馬亦唔需要咁攪法?

    而我自己亦有分析過: 比賽其實我唔太熱衷，因為唔鐘意俾人規定呢樣，規定果樣，咁究竟我追求緊d咩呢? 其實就連我自己都唔知～ 所以每次都只係是但答: 我鐘意囉～

不過，我諗我已經搵到答案，雖然未知係唔係終極答案～

我終於知道，原來我一直想找尋嘅，並唔係能力嘅上限，亦唔係簡純嘅痛楚～

而係果種瀕死，最接近死亡嘅感覺～

原來係叫”湼槃的精神狀態”～

   唔覺意睇到呢段野，最後形容果種感覺，就好似終於搵到知音人一樣，開心到要即刻同大家分享一下～

23-Aug-14 熱血狂人 - 環港島超長課63.5k

    自從上次六月尾試過第一次環島之後，一直心思思想再跑～ 一來上次帶病上陣，覺得表現麻麻，二來第一次跑唔熟路，跑一陣又要睇GPS, 又跑錯路又盛，攪到好唔爽同唔夠盡興! 而今次無論精神同體能狀況都非常good fit, 天氣雖然都係曝曬，但比起上次已經較為舒服，一切都完美配合，唔盡情環島跑獲金就真係對唔住自己囉～

   因為今次同上次環島路線大致相同，所以今次報告就只會補少少相, 同埋唔太多詳述，如有興趣可到<<28-Jun-14 環港島一週 - 無懼病魔 熱血制霸 57K 長課>>，重溫番上次環島嘅詳細報告～

   今次改由鯉景灣嘅港島體育館（電影資料館隔離）作為起點及終點～ 鎖好行李後就向東順時針方向跑，經小西灣上砵甸乍山，到達大浪灣，沿大浪灣道，石澳道，落港島徑第七段，穿過大潭篤村，上老虎山引水道，落番赤柱峽道，沿 赤柱村道去到赤柱廣場～而最難捱就係呢段，之後經淺水灣，深水灣，黃竹坑道，華富邨，數碼港，沿域多利道出到西環，上環，中環.........一直沿住 海岸線，最後終於完成環島一周，返到終點 — 港島體育館.

總結：

   今次環島超長課，可能天氣較為舒服，加上期待左再次環島好耐，體能異常地好，尾段至北角居然重可以加速，返到港島體育館，重游左一個鐘頭水，先至梳洗走人～

- 完 -

5-Jul-14 對抗極強酷熱天氣 58K 超長課 (沙田->紅磡->彩虹->西貢->沙田)

    經過數次超長課南征西討, 加埋上星期帶病環港島一役, 本來諗住安排今日跑條比較熟悉, 同難度較為低嘅路線, 當歇一歇, 順便整固下, 點知… 頂~ 今日熱到真係癲Q左, 中午直指34度~ 雖然最後都仍然完成, 但尾段開始失速, 好彩頭中段Pacing都keep得住, 全段平均步速都唔太差~

    今次唔需要搭車去起點, 所以唔駛咁早起身, 又可以輕鬆一d, 而且琴晚訓得唔錯, 感覺今日狀態good fit. 享用過例牌早餐四片麵包+齋啡, 攬惦哂d裝備, 換上戰衣, 落樓出發啦~

    頭段20k沙田明星至紅磡駕輕就熟, 全程進入巡航模式~ 係大埔道中段至深旺道落過一陣雨, 但反而重舒服, 幫我保留住d energy, 而且呢段之前報告講過太多次, 唔再詳述~

    過左紅磡碼頭左轉戴亞街直出, 戇居居出左馬頭圍道, 人多到連行都成問題, 嗱嗱林返轉頭由紅磡道去, 經過旭日街, 朗月街, 土瓜灣道, 左轉出宋皇臺道, 沿途真係曬到阿媽都唔認得, d皮膚係痛嘅~ 雖知道我已經係日曬夜曬, 練到已經無論點曬唔會再甩皮, 但依然感覺火辣刺痛, 可想而知今日簡直係跑者嘅無間地獄~

    走過亞皆老街同太子道東果段亂七八糟嘅交界, 沿太子道東直去到彩虹村, 跟住就上清水灣道, 經過彩雲二邨再上, 過埋”歡迎駕臨西貢區”牌, 之後有兩個油站, 緊係第一時間補水先, 途中經過上札山道路口, 好似記得有ching 提過呢度, 話斜度好高, 下次有機會挑戰下, 見識下~

    補完水就繼續旅程, 走過井欄樹, 向上見到遠處壁屋監獄, 知道硬仗終於殺到, 當時真係嘔血, 又熱又曬, d皮膚又火辣刺痛, 加埋果條死人大斜, 但知道捱過壁屋之後係超級甜品, 即時唔理咁多衝上去~

    哈哈~ 捱過壁屋再走一小段, 跑過嘅ching / ctse都知, 之後果段2.5k至西貢公路真係爽到核爆, 全程大落斜, 而且路闊唔焗, 馬上啟動慳力模式, 只要控制住pacing唔好過快就惦~

    落到迴旋處發覺冇哂水, 又口渴到死, 好彩前d匡湖居有間沙漠中嘅7仔, 馬上飛身撲入去, 補水之餘順便歇番陣, 出面實在曬到PK, 開始有d頭痛~

    跟住途經白沙灣遊艇會, 獅子會自然教育中心, 菊花牌漆油廠, 終於到達西貢市中心, 左轉右轉去到西貢碼頭, 非常非常熱鬧~ 先去厠所洗面同用水淋頭降降溫, 再去OK補水, 順便周圍行下睇下女~

    響碼頭逗留左一陣, 歇左一陣諗住回復狀態, 最後呢20k要keep住pacing應該問題不大, 點知去到水浪窩開始跌watt, 響失速同極度疲倦情況下, 惟有咬住牙根不斷同自己講: “There will be a day when I can no longer run. Today is not that day”, 直至返回明星.

呢段由西貢碼頭至明星, 詳細路線請參考<<4-Jan-14 首次東征長課 49K (沙田->西貢 來回)>>.

後記:
    呢次真係低估左天氣嘅威力, 始終同大自然相比, 人嘅力量實在係好渺小~  收睇多謝~

-完-

28-Jun-14 環港島一週 - 無懼病魔 熱血制霸 57K 長課

    為左今日嘅環港島長課, 做左成個星期功課, 包括繪畫路線圖, 再上google實境行一次, 加埋搜集左各位Ching / Ctse寶貴意見, 令到今次嘅熱血長課能夠順利進行, 響度再向各位表示感激萬分~

   有時真係就算你已經做足準備, 但依然係有意外~ 琴晚突然頭好重好痛, 估計係積存嘅內感又試發作~ 頂… 大佬呀, 呢個時候黎玩野, 點攪???!! 不過都係果句: 冇野阻到我, The show must be go on! 嗱嗱林啪兩粒特強幸福, 跟住同自己講: 唔好玩野, 聽日係唔會改期, 係想死響途中嘅, 就繼續病啦~ 啪完早D訓, 話X之佢, 聽日出征環島跑!!

    第二朝起身, 頭痛情況已經好左d, 但肌肉未返番去癲峰狀態~ But sorry~ 惟有帶病上陣嘞~~ 早餐冇多冇少, 4片麵包+齋啡一杯, 執好行李, 上齊架撑~ gogogo~

   照計劃搭682去到鰂魚涌, 先將行李放響公司~ 跟住響渣華道近消防局正式向東出發~ 往渣華道東行, 轉入鰂魚涌公園, 沿海傍緩步徑走過鯉景灣, 呢段一路上邊影邊跑, 海邊風景風實在好~

   到左筲箕灣入隧道左轉加轉, 上番地面東熹道, 右轉阿公岩道出柴灣道, 可能係頭段關係, 條柴灣道又冇想像中咁大挑戰~ 三扒兩撥入到工業區, 經過藍灣半島, 轉入小西灣道進入小西灣海濱花園~ 咪住先~ 去小西灣運動場補補水洗洗面先~ ok, 攪惦~ 但頭都係有D痛~

   上左一段石級, 到左龍躍徑~ oh shit! 呢度度就金金地啦~ 斜之餘, 又左轉右轉, 加上我又未跑過, 好似跑極都唔完咁~ 上到龍躍樂園, 本來砵甸乍郊遊徑入口就響對面, 但我又戅居居轉右直去, 落左歌連巨臣角懲教所~ 你老味~ 又要上斜番轉頭~ 返番砵甸乍郊遊徑入口, 惦~ 殺呀~

    點知頭果段天梯真係行撚到索氣, 邊有咁撚長嘅石梯架~ 但係咁都要行架…大佬~ 頂硬上終於到左最高點~ 跟路牌直去大浪灣~ 之後係全落石梯, 哈~ 唔好以為落石梯就爽喎~ 隨時唔一個留神絕對係會變PK陳~ 不過辛苦都值, 望落去大浪灣同四週風景真係靚到冇野講~

    落到大浪灣, 沿大浪灣道, 石澳道(雖然都係要跑馬路, 但呢段石澳道夠闊同今日好天, 所以唔大問題~), 去到港島徑7段入口, 我話你知當時有幾熱同曬, 去到呢度我部電話已經因over heat而hang死左, 要去到赤柱廣場入厠斤沖凍水同攪左一陣先番生, 所以呢度至赤柱就影唔到相嘞!

   沿港島徑去, 風景依然一流, 不過就真係迂迴曲折, 跑極都唔撚完咁款, 頂~ 其實當時係有d急, 事關頭段呢度消耗左好多體力~ 終於到左轉落大潭道位置, 呢段好有d煩, 又係要馬路疾走~ 不過好彩只係大概只係K半野就轉入大潭篤村村路, 沿村路直去轉去大潭水塘道, 跟住上老虎山引水道, 跑呀跑呀~ 依然好撚頭痛~ 終於落番大潭道, 呢段大潭道ok啦, 有正常行人路~

跟住大潭道直去然後左轉赤柱村道~ 噓~ 鬆一口氣, 之後條路我熟手啦~ 哈哈~

     到左赤柱廣場, 當時感覺好似去左沙漠中嘅綠州咁, 事關我當時已經口渴到P哂K~ 真慘~ 第一時間緊係飛身落超市買水狂飲~ 正~ 再去厠所洗面同沖下部電話~ 哈~ 又攪倒佢番喎~ Good~

   之後赤柱至北角就唔詳述啦~ 惟一唔同係今次醒目啦, 響淺水灣道右轉南灣道, u turn落海灘道, 之後麗海提岸路, 上番香島道即刻又落番苗鍾徑, 完全避開哂上次d PK位~

後記:
    可能今次帶病上陣頂硬上, 所以真係好耐未試過感覺到咁辛苦, 跑完搭車歸家途中, 差D訓到去總站~~ 唉~~







寫唒d check point響手臂~