星期日凌晨5點起身, 食完早餐+齋啡一杯, 梳靚個蛋撻, 換戰衣上架生, 執埋行李, 準時6點出發~
搭巴士去到九龍灣地鐵B出口, 等埋幾個老友, 去埋厠所放放水, 就一齊轉shuttle去會場, 中途好鬼塞車, 我又凍到死, 心諗: 頂~早知跑入去啦~ 攪左一大輪, 終於到場嘞, 落車先視察下環境, 原來已經好多跑手到左場, 非常熱鬧~ 我先同其他兄弟會合, 跟住執好行李, 扣上racing belt, 就去存放行李. 排隊存好行李後, 一轉身就撞見Duncan ching, 先黎一個擁抱, 然後即時又遇上ibook ching, 再互相鼓勵一番, 再各自為比賽作最後準備~ (事後發覺當時太興奮, 居然唔記得影張合照).
聽到大會嗌咪召集上線, 我嗱嗱林搵到Zone B上線位, 盡量攝前D, 希望開步唔會太塞人~ 當時太陽未出, 我繼續凍到pk, 鬼咁辛苦等D開禮嘉賓講一大輪野, 望下錶已經0829, 正~ 終於捱完凍啦~
3..2..1~ 咇~ 一開步可能因為太凍, 以4’10 pacing跑左幾k, 到體溫漸漸回復正常, 就將pacing修正為4’20, 當出到九龍灣工業區, 大概係官塘繞道下邊位置, 突然有一把熟悉聲音響起: Joe~ 加油呀~, 我望向左邊對面, 見到施sir向我打氣, 同佢輕輕揮手後, 即時精神百倍, 再以4’10 pacing狂奔左一段~
響條街度左轉右轉, 又上行人天橋又草地又碎石地又盛, 跟住上左官塘繞道, 呢度視野比較開揚, 但去水位左右傾側都頗為嚴重, 要搵個斜位高點黎跑, 會較為平d好跑d~
呢條官塘繞道差唔多佔左一半路程咁濟, 最好玩係每次經過折返點後, 都可以同對面黎緊O既跑手面對面相遇, 不時聽到: “教主~ 加油呀~”, “Joe~ 加油呀~” 大家大嗌加油之餘, 又同幾位跑手hi five~ 感覺非常好, 氣氛一流~ 正呀~
去到大概最後3-4k左右, 由繞道落返地面, 係時候踩盡油門嘞, 點知又撞正10k回程, 塞人塞到hihi, 好彩我平日跑長課跑慣旺區, 攝人罅技術都唔錯, 響唔減速情況下左攝右攝, 又俾我過左幾個半馬跑手, 但係當去到最後果條大直路橋O既時候, Oh my god~~~ 多人到, 路又窄, d人又平排四五個~ 點攪? 咁都冇計啦~~ 惟有硬闖人堆, 攝黎攝去, 又唔好意思, 又唔該借借……. 真係屎都滾埋~ 雖然當時馬路已經解封, 屌~ 唔撚理咁多啦~ 直衝落馬路邊, 哈哈, 終於又可以暴走啦~ 好~ 一鼓作氣下以4’15 pacing狂奔, 其間工作人者不停叫上返行人路, 但係響果個moment, 又點理得咁多, 直到橋尾先入番行人路, 唔係就入唔番終點衝線位~
轉入最後90度角灣位, 知道一定有好多鏡頭對住, 咁緊係用最靚o既跑姿同表情衝過終點感應區~ 衝線後睇睇錶, 自己紀錄就1h 30m, avg. pacing 4’20, 時間過得去啦~ 因為緊接重有下一場長課, 點都要留番D力~
響終點位企左一陣, 等左一兩個兄弟衝線, 另有三位跑會ching響比賽中途拍跳左一大段, 當佢地都緊接衝線後, 大家惺惺相識, 俾左個five, 拍拍大家膞頭, 感覺好有氣氛~ 跟住去番行李區取回行李, 之後在場中四圍行下, 先再回去會合朋友~ 在場中撞見Swing-KE ching同好多ching老友, 實在唔好意思, 太多我都唔太記得名啦~
在場邊會合番朋友, 大家影相留念, 吹下水, 跟住就一齊行番出去Mega Box~將紀念牌同行李交朋友暫保管~ 行到megabox附近, 同朋友道別後, 就開始和另一位ching開始下一場長課 – 九龍灣->沙田嘞~
第二場長課就唔詳述啦~ 全日總共大概51k左右, 雖然唔算太多, 但全日節目豐富, 都非常滿足囉~
後記:
基於上星期超馬賽上半段顧住昅野睇女, 下半段又肚痛, 以致成績唔太理想, 令各位失望~ 所以今次跑得非常專心, 冇睇女同欣賞風景, 基本上我都唔知跑左去邊, 只係見路就衝, 同不停睇pacing同時間, 盡力跑得好d, 以答謝大家對小弟o既鼎力支持~
今次閃咭雖然冇上次咁多, 但都會繼續大放送~ 又要麻煩各位ching / ctse過膠放銀包啦~~ haha~ 多謝收睇~
最後大會公布賽果, 組別第17, 全場第71, 大會時間 1:30:32~
**特別鳴謝兄弟David又再捱義氣做義務攝影師, 非常感激~
-完-
沒有留言:
張貼留言