因天水圍果邊實在唔熟路, 所以早一晚已經 Plan 好路線, 基本上只係劃好濕地公園接駁番去青公便可, 之後路線沿青公暴走就惦哂~
好~ 事不宜遲, 馬上進入正題~
早餐照舊四片麵包、齋啡一杯, 換好戰衣, 上好gear, 特別係今次新拍檔 – Acsis Layteracer RS2, 哈哈~ 同我偶像一樣咁痴Q線, 用全新鞋黎比賽同跑超長課.
由明星漫步過去瀝源 269D 巴士站, 上車訓左一陣, 大概1個鐘多d到達天富總站. 照計劃先行過去濕地公園當熱下身, 事關架巴士好Q凍, 攪到d肌肉硬哂~
到左濕地公園先沿濕地公園路走轉來回9K, 事關如果就咁直出, 番到明星全程就只得47K, 橫惦都要補里數, 咁諗住緊係響新地方補會開心D啦~ 點知後黎後悔到不得了, 睇落去你就會明~
再番到濕地公園正式起步啦~ 按照預先制定嘅planning經天富, 天瑞路, 天湖路左轉右轉, 去到洪天路直落到青公轉左, 之後一直跟實條青公就冇死啦~ 點知原來過左藍地之後有個大迴旋處, 條青公唔見左!!! 左搵右搵又問下人, 搵番o岩方向同條路, 繼續直走經過三聖, 黃金海岸~
又到番上次折返點豪景花園, o拿o拿林入百佳補水先, 過番對面青龍頭碼頭飲飲水, 歇一歇又繼續上路~ 之後情況同上次差唔多, 唔再詳述, 係天氣實在好乾好曬~ 全身成面都係鹽粉, 白Q哂~ 成身粉一路跑一路甩, D路人好似見鬼咁, 通通避開哂~
接住落黎又係跑完呈祥道, 轉上大埔道至金山果段魔鬼斜路, 望一望錶, 已經跑左45K, 噢~~ 響呢個距離整段咁嘅大斜黎嘆, 認真和味~ 唉, 早知開頭果9K返到城門河先補啦~ 後悔都冇用, 惟有下次醒D~ 硬食到金山, 又係甜品時間, 全程落斜, 爽~ 落埋徑口路….. 噓~~ 終於返到顯徑, 離終點只剩4.5K, 快快腳攪惦埋佢, 返屋企沖涼休息~
雖然今次唔係來回制霸, 但總算 foot print 可以去到西北方~ 將有一日我會完全食哂來回96K, 到時唔死得就再同各位報告~~
預告: 下一波將會揮軍南征, 目標沙田 -> 石澳, 路線已計劃好 (下有路線圖,各位好友不妨多俾意見) , 將盡快發動進攻, 各位請留意小弟最新連載報告~
今次盡量少字多相, 希望大家鍾意~ 多謝收睇~
超長課新拍檔 - Acsis Layteracer RS2
|
下一波南征預制路線圖 -- 沙田 -> 石澳 |
沒有留言:
張貼留言