早餐冇變, 都係四塊麵包+齋啡一杯, 跟手點齊裝備, 惦哂~ 出發南征~
先搭88R去中環6號碼頭, 半個鐘就到, 好快~ 到站落車行過去交易廣場巴士總站轉6號去赤柱廣場~ 上車訓陣先, 大概45分鐘就到~ 架巴士又係雪房咁, 落左車成身雪到硬哂~ 橫惦時間尚早, 不如四圍行下, 解凍兼影番D相, 唔係點向各位江東父老交代??!!
落去美利樓影完相, 去埋厠所放低二兩, 再上番廣場車站, 惦~ 出發!!
開始有D微雨, 都幾舒服, 沿佳美道, 環角道, 舂磡角道直去, 心情相當輕鬆, 沿途同路人打下招呼, 爽~ 直至由舂磡角道左轉淺水灣道, 惡夢正式開始~ 首先雨越落越勁, 勁到視野得番7成, 都未係最大獲, 再跑到淺水灣道中段, 吓~~ holy shit~ 攪乜鬼, 路肩越跑越窄, 突然連路肩都冇埋!! 當時雨勢更大, 我嘅視野只有5成左右, 四周迷糊一片, 我隱約見到原來冇路肩嘅長度大概有20-30米, 跟住又會有番一小段, 咁惟有向後望清楚冇車, 就用9秒8嘅速度落馬路向前飛奔~~ 呢個情況之後不斷發生, 而雨勢又加劇, 但都冇計, 心諗: 可能捱過淺水灣道就ok啦~
響不斷同死神搏鬥下, 終於跑完個條PK淺水灣道, 轉入香島道, 以為冇咁惡劣啦~ 頂~~ 點知佢老味~ 第一個大急灣又係咁撚樣, sorry~ 為著反映當時實況有幾咁pk, 同埋我果陣對住果個大灣, 真係連爆左30字粗口~ 我當時有閃過不如放棄返轉頭嘅諗法, 但識我嘅都知, 只要我決定開始左, 係天皇都阻唔到, 即時火都上哂頭, 心諗: 一係你就車撚死我, 唔係我點都要捱埋過去!! 就係咁, 惡從膽邊生, 回頭一見冇車, 即用全身飲奶力爆衝~ 好彩條香島道只係頭段係咁, 衝左幾次就回復有正常行人路~~ 噓~~ 終於攪惦~
但雨依然係激大~ 但我已別無所求, 係總之是但有條係人行嘅路就得, 其他野已經冇所謂~
離開香島道, 進入黃竹坑道, 當時差d喊出黎~~ 天啊… 終於去到d係人行嘅地方啦~ 跟住經過海洋公園道, 呀~ 不如轉入去海洋公園去去厠所洗洗面, 整理下先~ 唓~ 去到門口發覺要入場先有厠所, 咁絕情??!! 好~ 算Q數, 影兩張相走人. 之後香葉道, 香港仔海傍道, 石排灣道, 域多利道…. 哈~ 終於到左我好鐘意去嘅數碼港, 前幾個禮拜黎過呢度見客, 覺得風景好有南歐風味, 同冇乜人, 好舒服~ 果陣已經決定要攻入呢度, 今日終於實現~ 響數碼港專登收慢步速, 欣賞下風景, 同d鬼佬say下hi~
當然我嘅行程都要繼續, 離開數碼港, 又回到域多利道, 走過大口環, 西環, 西營盤, 途經信德, 龍和道, 告士打道, 興發街, 電氣道~ 到達北角碼頭, 先補補水先, 等左陣就上船~ 上到船唔座, 靜靜地企埋一邊拉拉根, 歇一歇, 畢竟已經跑左32k, 而又經歷過與死神搏鬥, 需要定定神, 回回氣~
船程只係10分鐘就到紅磡碼頭, 之後紅磡返沙田路線, 之前已報告過多次, 加上情況冇咩特別, 故不再詳述~
後記:
今次旅程頭段險象環生, 完全有死過番生嘅感覺~~ 世事如棋, 你又點估得到, 明明係LSD training, 又會無啦啦加插九萬幾set死亡interval!!??
回想我前晚因太多唔確定因數下, 而阻止其他跑友一齊拍跳嘅決定, 係極正確!!! 如果當時有其他人同我一齊跑嘅話, 響舂磡角道左轉淺水灣道嘅時候, 我已經會毫不猶豫地中止行程, 始終我唔可以俾其他人同我去冒險!!
 |
| 嘔血嘅淺水灣道同香島道 |
沒有留言:
張貼留言